Napoka Iriari elkarrizketa

Euskal Etxean euskara ikasten ari diren 4.mailako ikasleek galderatxo batzuk prestatu dituzte Napoka Iria taldeak erantzuteko, Euskal Etxean datorren larunbata hilak 22an emango duten kontzertuaren aurretik.

1) Musikaz bizi al zaitezkete ala beste lan bat daukazue?

Gaur egun oso zaila da musikaz bizitzea. Rock taldeetan batez ere. Nik dakidala Euskal Herrian oso talde gutxi bizi dira musikatik. Eta gure kasuan ere ez digu ekonomikoki askorako ematen.

2) Zer da zuentzat arrakasta?

Zuk egindakoaren gustura eta beteta sentitzea da guretzat arrakasta. Ez daukagu gaur egungo “arrakasta” terminoarekin ulertzen den guztia lortzeko intentziorik. Ezagun izatea, dirua… Bizitzeko eta bidaiatzeko nahikoa lortuko bagenu beteta sentituko ginateke.

3) Noiz esango duzue arrakasta lortu dugu?

Musika egiten bidaiatzeko aukera izatera helduko bagina, orduan esango nuke arrakasta lortu dugula. Honekin batera bizitzeko diru nahikoa lortuko bagenu lasai disfrutatu ahalko genuke musikaz. Amets guzti honetaz aparte jendeak gure musikaren disfrutatuko balu, “arrakasta lortu dugu” esango nuke lasai.

4) Kontzertu asko egin al dituzue Euskal Herritik kanpo? Sentitzen duzue kontzertu hauek ezberdinak direla?

Ba orain arte ez ditugu kontzertu gehiegi eman Euskal Herritik kanpo. Baina bi aste barru Japoniara goaz eta bertan ikusleak nola erantzuten ikusteko kuriositate handia daukagu. Orain arte egia esan igarri dugu jendea Euskal Herritik kanpo ezberdina dela. Hala ere Euskal Herrian herri batetik bestera desberdintasuna ikusten da. Errespetuaren eta kulturaren arabera asko aldatzen da jendearen jarrera.

5) Zeintzuk dira zuen talde gogokoenak?

Uf!! asko dira. Gaztetatik daramagu musika entzuten, eta ehundaka talde ezberdin gustuko ditugu. Hauek denetatik ezingo genuke bi edo hiru bakarrik hautatu. Hala ere 70. hamarkadako rocka eta 90. hamarkadakoa esango nuke direla gustukoen ditugunak.

6) Zein talderekin joko zenukete?

Jende jatorra den edozeinekin jotzeko prest gaude. Euskal Herrian talde on pila daude. Eta gehienak jatorrak dira. Kontzertuak konpartitzen jende asko ezagutzen da, musikak daukan beste alde polit bat da.