TXOKOA [euskal etxea] MAIG AGENDA

LITERALDIA06 WEB

Literaldia06-aren web orrialdea egina dago, ikusteko egin klik hemen

Tortura australiarren begietatik

Australiako SBS telebista kateak Euskal Herriko tortura kasuei buruz egindako erreportaia. Erreportai osoa ikusteko klik hemen

LITERALDIA06 [Kartela]

LITERALDIA06

Euskal Etxeak euskal literatura Katalunian ezagutzera emateko antolatzen duen literatura zikloak bigarren edizioa du aurten. Aurtengoari apirilaren 21ean ekingo diogu, eta maiatzaren 19an amaituko dugu, eta ikusi ahal izango duzuenez, iazkoa baino zabalagoa da prestatu dugun egitaraua. Abian dugu jadanik euskal ipuin lehiaketa, parte hartu nahi duen orori zuzendua, bi sail izango baititu: bata euskara ikasten ari direnentzat, sail honetan irabazleak datorren ikasturterako matrikularen erdia izango du sari; bestea parte hartu nahi duen ororentzat, 300 €-ko sariarekin. Lehiaketaren oinarriak gure egoitzan edo web orrialdean ikus ditzakezue. Hauek dira apirilean gozagai izango dituzuen ekitaldiak:
Apirilaren 21ean, ostiralarekin, 20:00etan: UNAI ELORRIAGA, 2002ko narratiba sari nazionala “Sp-rako tranbia” eleberriarekin irabazi zuena, bere lanaren gaineko hitzaldi ezin interesgarriagoa ematera etorriko da gurera.
Apirilaren 23an, igandearekin: Beste behin ere, Euskal Etxea kalera irtengo da Sant Jordi festa handia ospatzera. Bertan, euskal literaturaren azken lanak jarriko ditugu salgai. Zatozte beldurrik gabe!
Apirilaren 28an, ostiralarekin, 21:30ean: Mikelazulo Oreretar elkarteko kideak etorriko dira Euskal Etxera, musika, margoa eta olerkia batzen dituen “Kontrola” formatu txikiko ikuskizuna eskaintzera..
Maiatzaren 4an, ostegunarekin, 20:00etan: Altsasun sortutako Castillo Suarez olerkariak “Bala Hutsak” lana aurkeztuko du Euskal Etxean. Lan honetan, bere ohiko estiloarekin bat, gizonezko eta emakumezkoen arteko harremanek eragindako zauriak aztertzen ditu bere gordintasunean.
Maiatzaren 5ean, ostiralarekin, 18:00etan: Egoitz Lasa haurrentzako ipuin kontalaria. ETB-1eko Wazemank saioko aktore izateagatik da ezaguna aktore hau, baina azken bost urteotan haurrentzako emanaldiak egiten gozatu eta gozarazten du.
Maiatzaren 6an, larunbatarekin, 21:30ean: Monologo gaua. Egoitz Lasa eta Sergi Gartziak guretzat prestatu dituzten istorioekin barrea eta algara eragingo dizkigute. Zatozte!
Maiatzaren 12an, ostiralarekin, 20:00etan: Musika eta poesia batzen ditu “Mugaldekoak- Olerkiak eta mugako abestiak” ikuskizunak. Edu Zelaietaren “Mugaldekoak” liburuan dago oinarritua eta komunikazio ezaren hesiak gainditu nahi dituzten musika eta testuek osatzen dute, ezarritako mugetatik haratago joan nahi dutenak. Universitat de Barcelonako kaperan izango da emanaldia, euskaraz eta katalanez.
Maiatzaren 13an, larunbatarekin, 17:00etan – Bertso tailerra Miren Artetxerekin. Bertsolaritzan lehen urratsak emateko aproposa da 4 orduko iraupena izango duen tailer hau. Baietz hau eta gero Bertso eskolan izena eman!
Maiatzaren 19an, ostiralarekin, 21:30ean: Bertso-afaria. Gure ohiko afari soziala literatura zikloan txertatu nahi izan dugu, literatura ukitua emanda, jakina. Horretarako, Maddalen Lujanbio eta Miren Artetxe bertsolarien bertso emanaldia prestatu dizuegu.